Homiladorlikning o’ttiz to’qqizinchi haftasi

Boladagi o’zgarishlar

Homilaning o’rtacha uzunligi 50 sm, og’irligi 3000-3500 gr. Terisi och pushti rangda, tukchalar sezilmaydigan darajada, boshidagi sochlarining uzunligi 2 sm. Ko’zlari mukammal shakllanib bo’ldi. Markaziy nerv tizimi rivojlanishda davom etmoqda. So’rishni boshqarishga javobgar bo’lgan nerv yetarlicha takomillashgan.

Onadagi o’zgarishlar

Qorinning pasayishi homilaning tug’ilishga tayyorlanayotganidan darak beradi. Bolaning boshi onasining tos suyaklari orasiga joylashgani sabab qorin pastga tushadi. Bu holat odatda tug’uruqqa 2 yoki 4 haftalar qolganida ro’y beradi. Avval tuqqan ayollarda bu sezilmasligi ham mumkin. Bu vaqtda o’pka va oshqozonga bosim kamaygani uchun homilador ayol o’zini yaxshi his eta boshlaydi, nafas olish yengillashadi. Boshqa tarafdan esa siydik qopi, tos bo’g’imlariga og’irlik tushadi. Yurish va o’tirishga qiynalasiz. Hojatga tez-tez borishingiz mumkin. Bel sohasida og’riqlar boshlanadi. Natijada o’tkir sanchiqli og’riqlar paydo bo’ladi.