Ҳомиладорликнинг еттинчи ҳафтаси

Боладаги ўзгаришлар

Кичкинтой ўсиб, катта бўлмоқда. Ҳозирда унинг узунлиги 6-9 мм. Жигар қон айланишининг марказига айланди. Қизилўнгач, нафас олиш йўллари, қорин олд деворчаси ривожланади. Ингичка ичак ва кўкрак қафаси шакллана бошлайди. Оғир вазиятларда инсонга ёрдам берадиган энг муҳим без – буйрак усти безларининг устки қатламига асос солинади. Бош мия жадаллик билан ривожланади. Юз маълум бир шаклга эга бўлади, лекин кўзлар ҳали ён тарафда жойлашган ва қаттиқ юмуқ ҳолатда бўлади. Оёқ ва қўллар аниқ кўринади. Юрак ҳомила танаси бўйлаб қон ҳайдай бошлайди. Умумий қилиб айтганда, марказий нерв системаси юзага келади. Суяк ҳужайралари ривожлана бошлади.

Онадаги ўзгаришлар

Кўпчилик аёллар ҳомиладорликнинг иккинчи ойида жисмоний ва руҳий ўзгаришларга дуч келишади:

• кўнгил айниши, қайт қилиш, сўлак оқиши;
• қабзият;
• жиғилдон қайнаши, овқат ҳазм қилиш жараёнининг бузилиши, ошқозондаги оғирлик;
• кўкрак безларининг ўзгариши: улар катталашиб, оғирлашиб, таранглашиб қолган, сўрғич учининг ранги қорайган;
• доимий бош оғриғи;
• ҳушсизлик ва доимий бош айланиши;
• кайфиятнинг беқарор бўлиши, жаҳлдор, йиғлоқи бўлиб қолиш;
• хавотир, қўрқув, тез хурсанд бўлиш.

2-ойдаги лаборатория текширувлари:

Қиндан суртма олинади.

ВИЧ ва захм касалликларининг текшируви учун қон таҳлили олинади.

Қон ва пешобнинг умумий таҳлили олинади.

ХГ гормонини аниқлашга пешоб топширилади, бу гормон орқали ҳомиладорликнинг кечиши аниқланади.

Юқорида айтиб ўтганимиздек, ҳомиладорликнинг илк ҳафталаридаги тавсияларга амал қилинг. Агар ҳали ҳам чекишни ташламаган бўлсангиз, тезда бундай зарарли одатдан воз кечинг.