Иссиқ сув ҳисоблагичини қиёслашдан ўтказиш (ечиш ва улаш билан бирга)

Бу қуйидаги тартибда амалга оширилади:
1. Талабгор иссиқ сувни ҳисобга олиш ускунасини (ҳисоблагични) ечиш, қиёслашдан ўтказиш ва ўрнатиш учун ДХМга ўзи келиб мурожаат қилиши ёки ЯИДХПда рўйхатдан ўтиши керак. Ҳамда давлат хизматини кўрсатиш учун йиғим тўлаши керак.
2. Иссиқлик таъминоти корхонаси 5 иш кун мобайнида талабгор билан келишилган вақтда, унинг иштирокида тегишли далолатнома тузган ҳолда ҳисобга олиш ускунасини ечиб олиши керак.
3. «Ўзстандарт» агентлиги 3 иш кун мобайнида:
Ҳисобга олиш ускунасини иссиқлик таъминоти корхонасидан қабул қилиб олиши ва қиёслашдан ўтказиш керак;
Сертификат ёки хабарнома расмийлаштирилгандан сўнг уларни ЭРИ билан тасдиқлаб, иссиқлик таъминоти корхонасига, шунингдек, ДХМ (ўзи келиб мурожаат этган тақдирда) ёки ЯИДХП орқали талабгорга (электрон тарзда мурожаат этган тақдирда) электрон шаклда юбориши керак.
4. Иссиқлик таъминоти корхонаси 2 иш кун мобайнида сертификат ёки хабарнома келиб тушганидан сўнг ҳисобга олиш ускунасини метрология хизматидан олиб кетиши керак.
5. Иссиқлик таъминоти корхонаси 3 иш кун мобайнида талабгор билан келишилган вақтда сўровномада кўрсатилган манзилга бориб, ҳисобга олиш ускунасини ўрнатиб бериш ва уч нусхада тегишли далолатнома тузган ҳолда тамғалаш, далолатноманинг бир нусхасини талабгорда қолдириши керак.
6. Иссиқлик таъминоти корхонаси 1 иш кун мобайнида хизмат кўрсатиш якунланганлиги ҳақида хабардор қилиш учун ҳисобга олиш ускунаси ўрнатилганлиги ҳақидаги далолатномани ДХМга юбориши керак.
Ушбу хизматнинг ҳуқуқий асоси Ўзбекистон Республикаси Вазирлар Маҳкамасининг 2019 йил 20 августдаги “Юридик ва жисмоний шахсларнинг электр энергияси, табиий газ, ичимлик ва иссиқ сувни ҳисобга олиш ускуналарини (ҳисоблагичларни) ечиш, қиёслашдан ўтказиш ва ўрнатиш бўйича давлат хизматлари кўрсатишнинг маъмурий регламентларини тасдиқлаш тўғрисида”ги 698-сон қарори ҳисобланади.
Мазкур хизматдан Ягона интерактив давлат хизматлари порталининг қуйидаги веб сайти: https://my.gov.uz/uz/service/310 орқали фойдаланишингиз мумкин.